Italia përgatitet për një mobilizim të gjerë me grevën kombëtare të premten më 30 tetor, e shpallur nga Unioni Sindikal i Bazës (USB) dhe USI-CIT. Protesta, raporton RaiNews, përfshin sektorët publikë dhe privatë, duke nxjerrë në pah vështirësi ekonomike, humbjen e fuqisë blerëse, kushtet profesionale të punëtorëve dhe qëndrimet kundër luftërave.

Ministri i Transportit, Matteo Salvini, ka nënshkruar një urdhër për të shtyrë ndërprerjen në sektorë të ndryshëm të transportit (ajror, hekurudhor, lokal, taksi), duke motivuar vendimin me përkujtimin e të vdekurve. USB, megjithatë, e ka quajtur urdhrin “të paligjshëm”, duke konfirmuar grevën për gjithë ditën në sektorët e përmendur, duke pranuar sanksionet.

Ndërprerjet do të prekin transportet e ndryshme: atë ajror për gjithë ditën e 30 tetorit; atë hekurudhor midis mbrëmjes së 29-s dhe mbrëmjes së 30-s. Vështirësi priten edhe për autostradat, taksitë dhe transportin publik lokal (me orare të ndryshueshme). Pasojat priten gjithashtu për arsimin, shëndetësinë dhe zyrat publike e lokale.

Manifestime dhe kortea janë parashikuar në shumë qytete italiane, përfshirë qendra si Roma, Milano dhe Bolonja. Thirrjes së USB-së për “të bashkuar protestat” i janë bashkuar studentë, bujq dhe lëvizje sociale. Autoritetet, raporton RaiNews, mbajnë një alarm të lartë për rendin publik, duke monitoruar çdo çrregullim.